Ho brah, da udda dey, I wen spahk dis page on da web. An den I tawt ho cuz, stay fo'eva since I wen bus da pidgin! Fo real brah I neva tawt dat I wud foget but since I wuz one small keed, ma maddah wen tell me fo stop. She sed no speak lidat bumbai you get one haad time fo get one job. Den jus lidat she wen pu me out Kaulawela skoo (das right nex Liliha Square nea Mayor Wrights) and she wen sen me private skoo. Was haad but das awri cuz I wuz still one small keed.

But for real kine, Now I no can speak la dis. Take me looong time fo rememba aw diskine stuff.  Afta leaving Kalihi, I wen move east side and I grew up one townie. So befo you get aw lolo an say "Eh brah, no ac! You no speak lidat!" Das tru. So wat boddah you?

But dat page fo real bring back some memreez. Get aw kine words I neva tink about fo long time. Chai click on da odda pages too (get moa den eighty-chree pages!) Get plenny words like hemo, an bumbucha, get ereding! Get aw kine old skoo stories like movies at Toyo by da Chinese Cultural Plaza. Ho da times wen change! But mo betta I stop cus dis making my spellcheck aw hemajang ladat.

Fo aw you haoles dat no can read dis. Chai dis one. But like ere'one say back home, "If can can , If no can... no can!"